Первое послание к Коринфянам, глава 7

  1. а о нихже писасте ми, добро человеку жене не прикасатися.
  2. но блудодеяния ради кииждо свою жену да имать, и каяждо жена своего мужа да имать.
  3. жене муж должную любовь да воздает. такожде и жена мужу.
  4. жена своим телом не владеет, но муж. такожде и муж своим телом не владеет, но жена.
  5. не лишаите себе друг друга, точию по согласию до времене, да пребываете в посте и молитве. и паки вкупе собираитеся, да не искушает вас сатана невоздержанием вашим.
  6. сие же глаголю по совету, а не по повелению.
  7. хощу бо, да вси человецы будут якоже и аз. но кииждо свое дарование имать от Бога, ов убо сице, ов же сице.
  8. глаголю же безбрачным и вдовицам. добро им есть, аще пребудут якоже и аз.
  9. аще ли не удержатся, да посягают. лучше бо есть женитися, нежели разжизатися.
  10. а оженившымся завещаваю не аз, но Господь. жене от мужа не разлучатися.
  11. аще ли же и разлучится, да пребывает безбрачна, или да смирится с мужем своим. и мужу жены не отпущати.
  12. прочым же аз глаголю, а не Господь. аще которыи брат жену имать неверну, и та благоволит жити с ним, да не оставляет ея.
  13. и жена аще имать мужа неверна, и тои благоволит жити с нею, да не оставляет его.
  14. святится бо муж неверен о жене верне, и святится жена неверна о мужи верне. иначе бо чада ваша нечиста были бы, ныне же свята суть.
  15. аще ли неверныи отлучается, да разлучится. не поработися бо брат или сестра в таковых. в мир бо призва нас Господь Бог.
  16. что бо веси, жено, аще мужа спасеши, или что веси, мужу, аще жену спасеши,
  17. точию коемуждо якоже разделил есть Бог, кииждо якоже призван бысть Господем, тако да ходит. и тако во всех церквах повелеваю.
  18. во обрезании ли кто призван бысть, да не отторгнется. в необрезании ли кто призван бысть, да не обрезуется.
  19. обрезание ничтоже есть, и необрезание ничтоже есть, но соблюдение заповедеи Божиих.
  20. кииждо в звании, в немже призван бысть, в том да пребывает.
  21. раб ли призван был еси, да не нерадиши. но аще и можеши свободен быти, больше поработи себе.
  22. призванныи бо о Господе раб, свободник Господень есть. такожде и призванныи свободник, раб есть Христов.
  23. ценою куплени есте. не будите раби человеком.
  24. кииждо в немже призван бысть, братие, в том да пребывает пред Богом.
  25. о девах же повеления Господня не имам. совет же даю, яко помилован от Господа верен быти.
  26. мню убо сие добро быти за настоящую нужду, яко добро человеку тако быти.
  27. привязался ли еси жене, не ищи разрешения. отрешился ли еси жены, не ищи жены.
  28. аще ли же и оженишися, не согрешил еси. и аще посягнет дева, не согрешила есть. скорбь же плоти имети будут таковии. аз же вы щажду.
  29. сие же глаголю, братие, яко время прекращено есть прочее, да и имущии жены, якоже не имущии будут.
  30. и плачущиися, якоже не плачущии. и радующиися, якоже не радующеся. и купующии, яко не содержаще.
  31. и требующии мира сего, яко не требующе. преходит бо образ мира сего.
  32. хощу же вас безпечальных быти. не оженивыися печется о Господних, како угодити Господеви.
  33. а оженивыися печется о мирских, како угодити жене. разделися жена и дева.
  34. непосягшая печется о Господних, како угодити Господви, да будет свята и телом и духом. а посягшая печется о мирских, како угодити мужу.
  35. сие же на пользу вам самем глаголю. не да сило вам наложу, но к благообразию и благоприступанию Господеви безмолвну.
  36. аще ли же кто без образити о деве своеи непщует, аще есть превозрастна, и тако должна есть быти. еже хощет, да творит. не согрешает, аще посягнет.
  37. а иже стоит твердо сердцем, не имыи нужды, власть же имать о своеи воли, и се разсудил есть в сердце своем, блюсти деву свою, добре творит.
  38. темже и вдаяи браку свою деву, добре творит. и не вдаяи, лучше творит.
  39. жена привязана есть законом, в елико время живет муж ея. аще же умрет муж ея, свободна есть, за негоже хощет, посягнути, точию о Господе.
  40. блаженнеиша же есть, аще тако пребудет, по моему совету. мнюся бо и аз духа Божия имети.
Поделиться:
Facebook ВКонтакте Twitter